حِسِن/عريان السيد خلف
حِسِن يا حِسِن
يمولّع العين الما تريد تمل
وتملها انته
وتملها دموعها وينكسر بيهه الظِل
وتسورب ويه جدمينك
تود لو فوكها جدام الترافة تحل
يمن دمنه علجدمك لو هدرته يحل
وتمايل
راوح عللروح
روحي معلمه وتحمل
جدم يصعد
جدم ينزل
عمرهه ولا تكَول احاه
واليشكي المصيبة يذل
وطبع روحي اريحية تشيل راس الخل
جثير الحملوهه ذنوب
كالوا يوم مات تمل
وكالوا والحجي بلا ساس
ياساس الصبر يكتل
وادلل بالهوى اتدلل
يهالحلوين
مامش زين
وي اهل العدل يعدل
يهالوكحين
مامش طيف
يطوي رموشنه وينزل
وتصدّ انته
ويصدّ الكل
هفه وكَلب الوفه من الطيب
ياهل الطيب ظل ممحل
شجى الدنيا؟!
وطبعها الناس صار سنين متبدل
حِسِن يالحِسِن لا تنباع
بيع اهل الهوى يخجّل
شجا طيفك؟!
يدك العين
يردس بابهه ويجفل
ولا جنه بدمعهه سنين
ظل صيف وشتى مكَيّل
يضوّكَها الحزن وتشوف
سهم مصابها كَليّل
جرتْ يهل الحسن مليت
سمجه وفولكم تشهل
يلاكَنّي وي مجرى الماي
عشرة تصيب وحدة تزل
واظلن ساعه اواسي الروح
ساعه اشتاك ساعه اعذل
اظلن مثل سدرة بيد
ما بيهاش غير الظل
تكَلي بوجه ريح اثبت؟!
انا يالحِسن ما بياش
طول سنين عمري اكبت
والك دمعي وبري من العين
كون لغير شوكَي تكت
يهالعايش بنبض هواك
ما تطلع لمن يسكت
يطيفك ما يشت عالعين
الا الشوف عنها يشت
دواصلني الوصل مريود
جم دوب الدليل يزت
عتابة وحسرتك للموت
تبكَى بهرش كَلبي تعت
يلمأمّن زمانك داس
ما تدري شوكت ينكت
ولو شان الكُبَرْ بالبيد
غصباً عالعطش ينبت
لَجَن بالروح كافي تفت
رهيفه وكَصى وياها الضيم
فوك همومها يحمّل
وأدلل بالهوى اتدلِل
يهالحلوين
يهالوكحين
ومامش طيف
يطوي رموشنه وينزل
