***** شتريد تسمي سمينا*****
--------عريان السيد خلف------------
شتريد تسمي سمينا
تجسَرْ واكح اليدريك
واشخص مايٍ بعينه
واخذ نوبك ولولا اللوم لَنه جلات مابينه
جزرنا وحدر السفان ما وجه علشاطينه
ونشفنا ولاهرش بالروح غزر بي ملح طينه
شعجب وهروشنه من تموت بيد الموت تبجبنه
ولو كل واحد بدينه
الك بينا العمر منذور مطلوبتلك سنينه
فرح عشره وضحك ساعات وتمرجح ليالينا
وهوانا وطيفنه الكذاب والشوك البتل بينه
الك بينه؟
والك بينه؟
ومشى المصيوب يتوجى علعشرينه
يحشم وين المحبين وين الوفي اليوفينه
يخوتنه يعشرتنه
يشامتنا يواشينا
تبروا واليطيح يكوم
كون المستحى يعينه
يتل سنته ويدك الشوك
وج يسنينه شبينا
نشفنا ولانداوة فيض بعد الموت تحيينا
وتظل بس الحسافه اطياف
مجلوبه وتمنينه
تمنينه
تمنينه
شتمنينه
شتمنينه
تمنينه العمر شمعة سهر والريح تطفينه
وتمنينه خيال بماي راكد روج يمحينه
وتلملمنه وتبدينه
وصبرنا شيكدر المذبوح وشبيده علسجينه
يصبري ستر علينا
مضيف الشوك يابو الشوك ما نكرت فناجينه
وعشير الما تهزه الريح وك خفت ميازينه
نهاني وسنع العشرين واختل بثلاثينه
وحك وشلة توالينا
لشاجج عيني بعينه
واكللله الدغش بهواك وك موش الدغش بينه
هذوله احنا الزرعنه الطيب شتسمينا سمينا