نيتك فلا تصفه

ضحكت انه شكثر من شفت عرسك صار
وبيك اتشمتت لن طبعك انعرفه

ماشفت العرس كدامي من زفوك
شفت تابوتك انت بساعة الزفه

شفت بس النعش واهلك بقو يبجون
لأن ضنهم كسرته وما اضن يشفه

وانه ياما وصفتك تــُـحفه بالاشعار
وكلبك مايدك هم يشبه التـُحـــفه

كبل نضفتك اني ومانفع وياك
لان كلبك وصخ متكلي شيــنظفه

ماتصفه انت نيتك من كبل ادريك
واذا نيتك مشــت عالطين تتحفه

ماتصفه انت ابد موبيدك الموضوع
شسويلك بعد نيتك فلاتصفه

اذا حته النهر يكره يمس جفيك
ولبس جف النهر من شالك بجفه

ولا ضفه التريدك انت يل مسكين
وياضفه التشوفك تشرد الضفه

اكدر اجرحك واكدر اذل عيناك
واغدرك اكدر اني و بيك اتشفه

سفينه بلاشراع اتخيلك بالماي
وفوك الضيم بيك انكسرت الدفه

يل نايم ضميرك وانت صاحي اليوم
ومن يكعد ضميرك تتركه وتغفه

ولك محد يحبك جاملوك هواي
حير بنفسك انت وشوفلك صرفه

دمك لونزف محد يجيك اسعاف
لان دمك قذر وينكس بنزفه

حته جفوف كلبي تغمك من تفوت
وعليك الناس تهمس (موت اليكرفه)

نزلت المستواك من السمه الهلكاع
وشفت شكد ضروف هواي مختلفه

ومثل طبع الصكر من ينزل اعله الصيد
نزلت وهنتك بكل روح متلهفه

كشفتك للبشر عرفوك ياجذاب
ماتسوه بعد تـــتصنع العفه

يل شفافك صفت ساحة حرب للناس
وعليهه اطلال ضلت من الف شفه

ولك محد يحبك جاملوك هواي
حير بنفسك انت وشوفلك صرفه

شعر صهيب السامر